Chegou a hora de Fanny e Alexander

Fanny e Alexander – Danzarei para ti (se botas outra moeda)

Levabamos tempo agardando a chegada do novo disco dos Fanny e Alexander. Desde A Regueifa infórmannos de que o nome do seu traballo será “Finais dos 70s, comezos dos 80s” e levará de novo o particular selo de pop electrónico do dúo formado por Noel e máis Efi. As letras serán unha vez máis adaptadas de poetas como Carvalho Calero, Daniel Salgado ou Lois Pereiro. O tema de adianto que se nos presenta tanto en formato videoclip como en mp3 é este “Danzarei para ti (se botas outra moeda)” baseado no poema “Balada do peep-show” de Elvira Riveiro que acompañamos a continuación.

se botas outra moeda danzarei de novo para ti
non haberá máis condena que o vidro ennegrecido
(poderás seguir matando gatos nas piscinas)
e o bamboleo da que non se sabe se dentro dun camión de machorras
para a feira
ou a star dunha marcha triunfante-alucinóxena
e se sorrío poderás lerme nos dentes o destino que te
espera
(canto mellor será se a túa moeda é grande
e o teu amor)

pero mentres ollas e non afundo
neste asedio de lodo e de indixencia
en canto xira o meu podio fascinante
se botas outra moeda
danzarei de novo para ti

Novo videoclip dos brasileiros Moptop

Moptop – Sempre Igual

Parece que os Strokes cariocas aínda teñen pensado espremer o seu debut homónimo en longa duración do ano pasado un chisco máis. Tras sacar o primeiro single no 2006 O rock acabou, agora atacan con un novo sinxelo este Sempre Igual. Na súa web te invitan a re-misturar este tema e mesmo a realizar a túa propia proposta de videoclip que terá premio para aqueles participantes que eles escollan. Sei que para moitos a banda semella un calco de tantas bandas de Nova York mais resulta interesante observar como é posíbel facer algo de calidade, tanto na produción como no artístico, sen renunciar ao idioma de seu. Desde este blog animamos, pois, a todos aqueles que gustarían de cantar en galego e aínda non deron o paso, a facelo. Traballos como o de The Homens ou estes Moptop demostran que o rock e o pop non entran en conflito coa lingua galega.

O retorno dos homens

 

Un dos retornos máis agardados no panorama pop galego é o dos composteláns The Homens. Logo de percorrer a Galiza enteira deixando ao vivo mostras incontestábeis do seu bo facer musical encerráronse uns dias nos estudos Ultramarinos Costa Brava (Catalunya) para plasmar a súa salientábel evolución como banda no que será o terceiro longo traballo, que publicarán no selo Falcatruada e que aparecerá en formato cd (clásico) pero tamén como pack completo que incluirá vinilo, cd e mp3 (supoño que mediante un código para a súa descarga na rede). O disco chamado Tres estará á venda a partires do 15 de outubro, mentres non chega o momento podedes escoitar un pequeno adianto no espazo que o selo tenlles adicado na súa web. Preme aquí para escoitar tres temas de Tres. Poderedes comprobar a boa producción de Santi García responsábel do estudo onde tamén gravaron bandas como Tokio Sex Destruction ou Standstill, seus son a maior parte dos arranxos do disco que inclúen percusións,ventos, cordas e teclas para lle dar unha nova dimensión ao recoñecido, e recoñecíbel, son dos Homens. Sen dúbida unha boa noticia para todos aqueles que xa somos incondicionais do trio powerpop galegofalante con máis proxección de futuro.

Trilingüismo harmónico desde o Brasil

Vanguart – Cachaça

Semella que no Brasil teñen menos problemas para utilizar a lingua propia misturada con outras alleas, no caso da banda Vanguart dominan non só o portugués senón que tamén o inglés e o español. Seguro que Feijoo e Rajoi ficarían “encantados de la vida” se os grupos do país (do noso) foran tan pródigos no uso do verbo de Xespir e Cervantes… non sei se gustarían tanto da lingua de Camoens ou Castelao, semella que esa segue a darlles problemas estomacais (meus pobriños). Como, certamente, este blog non nace hoxe con desexo de polémicas, mais ben de información, agardo que gustásedes desta pequena marabilla pop que chega desde o Mato Grosso. A banda comezou como un proxecto en solitario do seu cantante o Hélio Flanders e co paso dos anos converteuse nunha das máis rechamantes promesas do indie brasileiro. Eles veñen de publicar o seu álbum homónimo de debut, como quinteto, neste 2007. Atrás quedan unha morea de ep’s, singles e mesmo un longa duración cando o grupo estaba só formado polo Hélio, un tipo con referencias tan suxerintes como Nick Drake, Lou Reed ou o mesmo Bob Dylan. Gozade e mesmo tomade nota de como temos que facer futuro.